İllərdir sağlam qida kimi tanınan, xüsusilə səhər süfrələrində geniş yer alan çiy pomidorun acqarına yeyilməsi bəzi insanlarda mədə-bağırsaq problemlərinə səbəb ola bilər. Belə ki, mütəxəssislər pomidorun çiy şəkildə mədə turşusunu artıraraq reflü və qastrit kimi narahatlıqlara yol açdığını xəbərdar ediblər.

Aztibb.az-ın xəbərinə görə, təcrübələr göstərib ki, bu tərəvəz səhərlər acqarına yeyildikdə mədə yanması, köp və narahatlığa gətirib çıxarır. Tam yetişməmiş, yaşıl pomidorlarda olan "solanin" adlı maddə isə baş ağrısı, ürəkbulanma və əzələ ağrıları ilə nəticələnir. Bundan başqa, bəzi insanlarda çiy pomidor allergik reaksiyalar - qaşınma, səpki, dodaqlarda şişkinlik və hətta nəfəs darlığına qədər bir çox problemlər yarada bilər. Həmçinin, çiy pomidorun tərkibində olan likopen maddəsinin orqanizm tərəfindən zəif mənimsənildiyi və həssas immun sisteminə mənfi təsir edə biləcəyi də düşünülür. Mütəxəssislər səhər yeməyində çiy pomidordan mümkün qədər uzaq durmağı, onu günün daha gec saatlarında və bişmiş halda istifadə etməyi tövsiyə edirlər.