Bəzi insanlarda zəngli saatdan əvvəl oyanmaq vərdişi var. Bu vərdiş zərərsiz görünsə də, bəzi hallarda hormonal pozğunluqlara işarə edir.

Aztibb.az xəbər verir ki, mütəxəssislərin fikrincə, əgər insan mütəmadi olaraq vaxtından xeyli əvvəl oyanır və yenidən yata bilmirsə, üstəlik bu vəziyyət qıcıqlanma, yorğunluq, ürək döyüntüsünün artması, narahatlıq, dəri quruluğu, dırnaq və saçların kövrəkliyi, həmçinin çəki itkisi, bədəndə titrəmə ilə müşayiət olunursa, sadalanan simptomlar qalxanvari vəzin həddindən artıq hormon istehsal etməsinin əlamətləridir. Lakin elə insanlar var ki, onların orqanizmi normal qrafikdən daha erkən təbii oyanmağa köklənib. Əgər erkən oyanmalar narahatlıqla müşayiət olunmursa, insan gün ərzində özünü gümrah hiss edirsə, səhər yeməyindən əvvəl yüngül aclıq varsa, enerji tez bərpa edilirsə və yeni gün rejiminə asanlıqla uyğunlaşırsa, narahatlığa ehtiyac yoxdur. Lakin yuxu fasiləli olub gücü bərpa etmirsə, bu, sağlamlıq problemlərinə bağlıdır. Yuxu rejiminin pozulması həyat keyfiyyətinə ciddi təsir göstərir ki, bu da diqqəti və immuniteti zəiflədir, həmçinin stres səviyyəsini artırır. Odur ki, qalxanvari vəzdən şübhələndikdə endokrinoloqa müraciət etmək məsləhət görülür.