ABŞ alimləri D vitamini əlavələrinin hüceyrə qocalmasını ləngidə biləcəyini müəyyən ediblər.

Aztibb.az-ın medimagazin.com.tr-yə istinadla xəbərinə görə, D vitamini əlavəsinin qocalmaya təsirini araşdırmaq istəyən elm adamları 4 il ərzində 1054 nəfərin ağ qan hüceyrələrində "telomer" adlanan genetik strukturların uzunluğunu təqib ediblər.

Elm adamları tədqiqatın əvvəlində və tədqiqatın 2-ci və 4-cü ilində telomer uzunluğu ölçülən iştirakçılara hər gün 2000 IU vitamin D və 1 qram Omeqa-3 yağ turşusu veriblər.

Tədqiqat nəticəsində elm adamları gündəlik 2000 IU vitamin D əlavəsi qəbul edən insanlarda telomer qısalmasının yavaşladığını və bunun bioloji qocalmanın yavaşladığı anlamına gəldiyini ifadə ediblər.

Alimlər göstəriblər ki, D vitamini əlavələri yaşla meydana gələn hüceyrə aşınmasını orta hesabla 3 il gecikdirə bilir.

Digər tərəfdən tədqiqatçılar araşdırmada sınaqdan keçirilən Omeqa-3 əlavəsinin telomer uzunluğuna heç bir təsirinin olmadığını qeyd ediblər.

Tədqiqatın nəticələri "The American Journal of Clinical Nutrition"da dərc olunub.