Məlumdur ki, günün yorğunluğu insanın yuxu keyfiyyətinə mənfi təsir göstərir. Gecə rahat yata bilməmək, səhərlər yorğun oyanmaq artıq geniş yayılmış problemdir.

Aztibb.az xəbər verir ki, mütəxəssislərin fikrincə, bu problemin qarşısını albalı yeməklə almaq olar.

Araşdırmalar göstərib ki, albalı təbii melatonin mənbəyi olduğu üçün yuxuyagetmə prosesini asanlaşdırır. Yatmazdan əvvəl albalı yemək və ya suyunu içmək yuxunun həm müddətini, həm də keyfiyyətini artırır. İki həftə boyunca aparılan eksperimentlərdə yuxusuzluqdan əziyyət çəkən yaşlı şəxslər yatmazdan 2 saat əvvəl və səhər saatlarında bir stəkan albalı suyu içiblər. Nəticədə onların ümumi yuxu müddətinin orta hesabla 84 dəqiqə artdığı müşahidə olunub. Mütəxəssislər yuxu keyfiyyətini artırmaq üçün albalı ilə yanaşı, melotoninlə zəngin olan bal, banan, badam kimi qidalara da üstünlük verməyi tövsiyə edirlər. Bu qidalar da melatonin istehsalını stimullaşdıraraq bədənin yuxu mexanizmini tənzimləyir. Melatonini dəstəkləyən qidaların gündəlik rasiona əlavə olunması nəinki yuxu, ümumi sağlamlıq üçün də faydalıdır