Göz quruluğu, göz səthinin kifayət qədər nəm olmadığı bir vəziyyətdir və ümumi bir problemdir. Bu vəziyyət qeyri-kafi göz yaşı istehsalı nəticəsində baş verir. Gözlərdə quruluq, yanma, sancma, qaşınma, bulanıq görmə və gözlərdə ağırlıq hissi kimi əlamətlərlə özünü göstərir.

Bu barədə Aztibb.az-a Şəmkir Rayon Mərkəzi Xəstəxanasının Poliklinika şöbəsinin həkim-oftalmoloqu Samirə Salmanova məlumat verib.

Həkim bildirib ki, uzun müddət kompüter ekranına baxmaq, kondisionerli mühitlərdə olmaq, kontakt linzalardan və bəzi dərmanlardan istifadə etmək sözügedən hala səbəb ola biləcək amillərdəndir. Bu durum gündəlik həyat keyfiyyətinə mənfi təsir göstərir və müalicə edilmədikdə daha ciddi göz problemlərinə səbəb olur. Buna görə quru gözün səbəblərini anlamaq, onun əlamətlərini tanımaq və müvafiq müalicə üsullarını tətbiq etmək çox vacibdir. 

Onun sözlərinə görə, yaşlandıqca bədəndə əmələ gələn göz yaşlarının miqdarı azalır. Bu vəziyyət xüsusilə postmenopozal qadınlarda daha geniş yayılmışdır. Hormonal dəyişikliklər gözyaşı bu istehsalına təsir göstərir.

Həkim bildirib ki, bu simptomları yaşayan insanların bir oftalmoloqa müraciət etməsi və uyğun müalicə üsullarını öyrənməsi vacibdir.