Hindistan və Böyük Britaniyadan olan alimlər uzunmüddətli araşdırmadan sonra müəyyənləşdiriblər ki, süd məhsullarının az miqdarda qəbulu qan şəkərinin sabit qalmasına kömək edə bilər.

Aztibb.az xəbər verir ki, eksperimentlərə 30 sağlam insan cəlb olunub və onlar iki qrupa bölünüb. Respondentlər iki həftə ərzində iki fərqli pəhrizlə qidalanıblar. Birinci qrup həm bitki mənşəli qidalar, həm də süd məhsulları (məsələn, qatıq, pendir) qəbul edib - bu, lakto-vegetarian pəhriz adlanır. İkinci qrup isə yalnız bitki mənşəli qidalar və süd əvəzediciləri - tofu, soya südü kimi məhsullarla qidalanıb. Hər iki pəhrizin tərkibində eyni miqdarda kalori, zülal, yağ və karbohidrat olub. Hər bir iştirakçının qan şəkəri səviyyəsi xüsusi cihazlarla gün ərzində 96 dəfə ölçülüb. Bu, alimlərə gün boyu şəkər səviyyəsinin necə dəyişdiyini dəqiq izləməyə imkan verib. Tədqiqatın nəticələri süd məhsulları qəbul edən iştirakçıların qan şəkəri səviyyəsinin daha aşağı və sabit qaldığını göstərib. Onların orqanizmində yağların parçalanmasına və hüceyrələrin qorunmasına kömək edən asetilkarnitin maddəsi daha çox müşahidə edilib. Tamamilə veqan qidalanan şəxslərdə isə fenilalanin adlı maddənin səviyyəsi artıb ki, bu da qlükozanın bədəndə düzgün mənimsənilməsinə mənfi təsir göstərə bilər.

Tədqiqatın nəticələri "Clinical Nutrition" jurnalında dərc olunub.