May ayının gəlişi ilə bazarlarda satışa çıxarılan yaşıl alça təbii antioksidantlarla zəngin olduğu üçün orqanizmi cavanlaşdırır və artıq ziyanlı maddələrdən təmizləyir. Meyvə orqanizm üçün ən vacib vitaminlərdən olan C vitamini mənbəyidir. Bu vitamin orqanizmdə gedən bir çox proseslərdə iştirak edir - immun sisteminin vəziyyətini yaxşılaşdırır, dəriyə müsbət təsir edir, qocalma proseslərini ləngidir.

Aztibb.az xəbər verir ki, kalium və maqneziumla da zəngin olan alça bu iki element sayəsində ürək-damar sisteminin fəaliyyətini yaxşılaşdırır. Turşularla zəngin olduğu üçün orqanizmdə olan piyləri parçalayır, xolesterinin və şəkərin səviyyəsini aşağı salır. Bu səbəbdən arıqlamaq istəyənlər üçün alça əla seçimdir. Lakin bəzi xəstəliklər zamanı alçanın qəbulu əks göstəriş sayılır. Belə ki, mədə və onikibarmaq bağırsağı xorası xəstəliyi, qastrit zamanı alçanın qəbulu xəstənin vəziyyətini daha da ağırlaşdıra bilər. Bundan əlavə, onun həddindən çox istehlakı diş emalına mənfi təsir edir, mədədə ağırlıq, köp və s. xoşagəlməz hallara yol açır.