Yaponiyanın Hökumətin Milli İnformatika İnstitutunun (NII) tədqiqatçıları milli tibbi lisenziya imtahanından uğurla keçə bilən generativ süni intellekt sistemi hazırlayıblar.

Aztibb.az medimagazin.com.tr-yə istinadla xəbər verir ki, “Böyük Dil Modeli” (LLM) sinifli süni intellekt sistemi 700.000-dən çox lisenziyalı tibbi məqalə, məşhur tibbi internet saytlarından 16 milyon sənəd və dərsliklərdən ibarət hərtərəfli məlumat toplusundan istifadə etməklə öyrədilib. Milli tibbi lisenziya imtahanında “uğur həddini keçə” bilən sistem qlobal miqyasda hazırlanmış LLM modelləri arasında ən yüksək ballardan birinə çatıb.

Bildirilib ki, universitetlər, elmi-tədqiqat institutları və özəl şirkətlər də daxil olmaqla 40-a yaxın təşkilatla birgə istehsal edilən süni intellekt sistemi ilkin müayinə nəticələrinə əsasən mümkün diaqnozları təklif edə bilər. NII layihəsi çərçivəsində yeni sistemin kliniki müalicəni dəstəkləmək və əməliyyat səmərəliliyini artırmaq üçün istifadə edilməsi planlaşdırılır.