Mütəxəssislər yüksək dozada kofein istehlakının ürək ritminin pozulması, narahatlıq və dölün inkişafı kimi ciddi sağlamlıq riskləri yarada biləcəyini qeyd ediblər.

Aztibb.az xarici mətbuata istinadla xəbər verir ki, Almaniya Federal Riskin Qiymətləndirilməsi İnstitutundan (BfR) bioloq Anke Ehlers kofein istehlakı ilə bağlı qiymətləndirmə edib. O, orta səviyyədə kofein qəbulunun stimullaşdırıcı və müsbət təsir göstərə biləcəyini, lakin yüksək dozaların tərləmə, narahatlıq və ürək ritminin pozulmasına səbəb ola biləcəyini söyləyib.

"Kofein hamiləlik dövründə dölün inkişafına mənfi təsir göstərə bilər. Xüsusilə qida əlavələrindən alınan yüksək dozada kofein ölümcül ola bilər", - deyə Ehlers bildirib.

Bioloq qeyd edib ki, 200 milliqrama qədər kofeinin bir dozası (təxminən iki fincan qəhvə və ya dörd stəkan çaya bərabərdir) sağlam yetkinlər üçün təhlükəsiz hesab olunur. Ancaq fərdi həssaslıq fərqli ola bilər. Məsələn, tolerantlıq müntəzəm istehlakçılarda zamanla inkişaf edə bilər. Uşaqlar və yeniyetmələr üçün təhlükəsiz kofeinin miqdarı bədən çəkisi ilə müəyyən edilir. Buna uyğun olaraq, bir uşağın gündə hər kiloqram bədən çəkisi üçün 3 milliqram kofein istehlak etməsi tövsiyə olunur.