Qara çay dünyanın ən məşhur içkilərindən biridir. Tərkibindəki kofein sayəsində insana enerji verən bu içki antioksidantlarla zəngin olduğu üçün immuniteti artırır, orqanizmin qocalma prosesini ləngidir. Lakin onun mütəmadi qəbulu bəzi insanların sağlamlığına ciddi təhlükə yarada bilər. Bəs kimlər bu içkidən uzaq durmalıdır?

Aztibb.az-ın məlumatına görə, bu, ilk növbədə ürək-damar və sinir sistemi xəstəliklərindən əziyyət çəkənlərə aiddir. Tünd dəmlənmiş qara çay sinir sistemində həddindən artıq oyanıqlıq yaradır ki, bu da təzyiqin artmasına və ürək-damar sisteminin fəaliyyətinin pozulmasına səbəb ola bilər. Bu vəziyyət fizioloji olaraq belə baş verir: böyrəküstü vəzilər stress hormonları ifraz edir və təzyiqi artırır, beyinə qan axını güclənir, damarlar daralır, beləliklə, ürək oksigeni çatdırmaq üçün daha sürətli döyünməyə başlayır. Mütəxəssislər ona alternativ içki kimi yaşıl çayı tövsiyə edirlər. Çünki bu içkinin tərkibi antioksidantlarla zəngin olduğundan immun sisteminə müsbət təsir göstərir. Bundan əlavə, tərkibindəki katexinlər sayəsində həzm sistemini tənzimləyir və bədəndəki maye balansını qoruyur.