Böyük Britaniya və Avstraliyada fəaliyyət göstərən bir qrup tədqiqatçılar yaşlı insanlar üçün gündə cəmi üç dəqiqəlik orta intensivlikdə təsadüfi fiziki fəaliyyətin infarkt kimi ürək-damar xəstəlikləri və ölüm riskini əhəmiyyətli dərəcədə azalda biləcəyini müəyyən ediblər.

Aztibb.az www.healio.com portalına istinadla xəbər verir ki, tədqiqatın nəticələri “Circulation” jurnalında dərc olunub.

Tədqiqatçılar 24 min 139 nəfərin (orta yaş 62) 2013–2015-ci illərdə toplanmış məlumatlarını təhlil ediblər. İştirakçılar ən azı yeddi gün ərzində biləklərində akselerometr cihazı taxıb və özlərini idmanla məşğul olmayan fərdlər kimi təqdim ediblər. Analiz nəticəsində gündəlik həyatın bir hissəsi olan – ev işi görmək, alış-veriş etmək və ya ot biçmək kimi orta dərəcədə fəaliyyətlərin belə ürək-damar sağlamlığı üçün faydalı olduğu ortaya çıxıb.

Nəticələr göstərib ki, müntəzəm olaraq gündə ən azı üç dəqiqə orta intensivlikdə təsadüfi fəaliyyətlə məşğul olan şəxslər infarkt, insult və digər ürək-damar xəstəliklərinə məruz qalma və ya bu səbəbdən ölüm ehtimallarını azaldırlar. Bundan əlavə, gender fərqləri müşahidə olunub: kişilərin qadınlara nisbətən daha az təsadüfi fəaliyyət göstərdiyi müəyyənləşib. Eyni zamanda, fəaliyyətlərin sayı və intensivliyi artdıqca ürək-damar sağlamlığında daha böyük müsbət dəyişikliklər qeydə alınıb.

Tədqiqat qrupu vurğulayıb ki, yaşlandıqca çölə çıxıb idmanla məşğul olmaq imkanı məhdudlaşsa da insanlar ev işləri, bağçılıq və digər gündəlik fiziki fəaliyyətlər vasitəsilə ürək-damar xəstəlikləri riskini azaltmağa davam edə bilərlər. Əsas tövsiyə isə hər gün bir neçə qısamüddətli orta intensivlikdə fiziki fəaliyyətə zaman ayırmaqdır.