Türkiyənin Zonguldak Bülent Ecevit Xəstəxanası Qadın Xəstəlikləri və Doğum Kliniği rəhbəri prof. Müge Harma balanslı su istehlakının əhəmiyyətinə işarə edərək, hamiləlik dövründə çox az və ya çox su istehlakının bəzi problemlərə səbəb ola biləcəyini bildirib.

Aztibb.az-ın medimagazin.com.tr-yə istinadla məlumatına görə, M.Harma hamiləlik dövründə su istehlakının ana və körpənin sağlamlığı üçün əhəmiyyətli olduğunu deyib.

Su istehlakının hava istiliyi və hamilə qadının çəkisi kimi faktorlara görə dəyişə biləcəyinə diqqət çəkən Harma, qeyd edib ki, hamiləliyin ikinci və üçüncü dövründə normadan çox su istehlakına ehtiyac var. Bu, körpənin inkişafı üçün son dərəcə önəmlidir. Çünk,i anadan körpəyə keçən qidalar bu miqdarda maye ilə çox bağlıdır.

Harma bildirib ki, hamilə qadının istehlak etdiyi miqdar dəyişə bilsə də, gündə orta hesabla 2,5-3 litr su içmək lazımdır. O, çay, meyvə şirəsi, ayran kimi "rəngli içkilər"in suyun qarşılığı ola bilməyəcəyinə vurğulayıb: "Orqanizm maye ehtiyacının bir hissəsini buradan qarşılaya bilər, ancaq xalis maye ehtiyacı dedikdə gündə 8-12 stəkan su qəbul etmək lazımdır".