Yaz ayları təbiətin canlandığı, rəngarəng çiçəklərin açdığı bir fəsil olsa da, bəzi insanlar üçün çətin dövr sayılır. Havada tozcuqların bol olması allergiya şikayətlərini artırır.

Burun tutulması, asqırma, göz qaşınması kimi əlamətlər də tez-tez qarşılaşılan problemlərdəndir. Allergiya, əslində, orqanizmin çiçək tozcuqlarına reaksiyasıdır və təəssüf ki, bu vəziyyət yaz boyu, xüsusilə aprel və may aylarında davam edir.

Aztibb.az xəbər verir ki, fitoterapevtlərin fikrincə, bəzi bitki çayları və yağlar allergiya ilə bağlı simptomları azaldır.

Qaynar suya 1–2 damcı nanə yağı əlavə edib buxarı ilə nəfəs almağın xeyri var.

Zəncəfil allergiya nəticəsində yaranan iltihabı azaltmağa kömək edir və tənəffüs yollarını açır. Təzə zəncəfil nazik dilimlərə kəsilib qaynar suya əlavə edilir. 10–15 dəqiqə dəmlənir. Bu çaydan gündə 1–2 stəkan içmək faydalıdır.

Lavanda sakitləşdirici təsiri ilə həyəcanı azaltmaqla yanaşı, allergiyanın yaratdığı narahatlığı da aradan qaldıra bilər. Lavanda çayı hazırlamaq üçün qaynar suya bitkinin bir neçə çiçəyi əlavə edilib 10 dəqiqə dəmlənir. Bu çay gündə 1–2 stəkan içilir.

Sarımsaq immun sistemini gücləndirən və allergik simptomları aradan qaldıran güclü antibiotikdir. Təzə sarımsaqdan gündə 1–2 diş yemək faydalıdır.