Honq-Konq Universitetindən olan alimlər belə qənaətə gəliblər ki, infarkt, insult və aterosklerozdan qorunmaq üçün televizor seyr etmə müddətini gündə bir saatla məhdudlaşdırmaq lazımdır.

Aztibb.az-ın məlumatına görə, ateroskleroz damarların divarlarında yağlı "lövhələrin" əmələ gəlməsi nəticəsində inkişaf edir. Bu isə zamanla ürək xəstəlikləri, insult və periferik arteriya xəstəliklərinə yol aça bilər. II tip şəkərli diabet və oturaq həyat tərzi aterosklerotik ürək-damar xəstəlikləri üçün əsas risk faktorlarıdır. İnsanlar xüsusən də oturaq vəziyyətdə televizor izləməklə çox vaxt keçirirlər. Elm adamları sağlamlığa zərər vermədən televizor izləməyin nə qədər mümkün olduğunu müəyyənləşdirmək üçün II tip şəkərli diabetə genetik meyilləri olan təxminən 346 min nəfərin biomarkerlərini araşdırıblar. Nəticələr göstərib ki, gündə iki saatdan çox televizor qarşısında vaxt keçirənlər aterosklerotik ürək-damar xəstəliklərindən 12 faiz daha çox əziyyət çəkirlər. Eyni təsir diabetə meyilli insanlarda da müşahidə edilib. Onlar gündə bir saatdan çox televizora baxmadıqları təqdirdə, aterosklerozun inkişaf riski artmayıb.

Alimlər bildiriblər ki, oturma müddətinin azaldılması sağlamlığın yaxşılaşdırılması üçün mühüm vasitədir. Belə faydalı vərdişlər "pis genetikanın" mənfi təsirini neytrallaşdıra bilər.