Xətai Tibb Mərkəzinin Təcili Tibbi Yardım şöbəsinin müdiri Fuad Ağayev nəfəs borusuna qida düşərsə və boğulma baş verərsə bu zaman göstəriləcək ilk yardımla bağlı Aztibb.az-a məlumat verib.

Fuad Ağayev bildirib ki, qida nəfəs borusunu natamam və tam tuta bilər. Natamam tıxanma zamanı xəstəyə müdaxilə edilməz, öksürməsi istənər. Tam tıxanma vəziyyətində, xəstə nəfəs ala bilməz, rəngi göyərər və danışa bilməz. Bu vəziyyətdə Heimlich manevri deyilən bir texniki tətbiq olunmalıdır.

Onun sözlərinə görə, Heimlich manevri belə edilir: Arxadan xəstənin gövdəsinə sarılmaq lazımdır. Bir əlin baş barmağı mədənin üst , döş sümüyünün isə alt hissəsinə düşəcək şəkildə yumruq tutaraq qoyular. Digər əl ilə yumruq tutan əli tutar, qüvvətlə arxaya və yuxarı doğru təzyiq edilər. Bu hərəkət 5-7 dəfə yad cisim çıxana qədər təkrarlanar.

"Şüurunu itirmiş adama Heimlich manevri belə edilir: Xəstə yerə yatırdılır, böyrü üstə kürəyinə 5 dəfə vurulur.

Tıxanma açılmadığı təqdirdə xəstə düz bir yerə uzadılır və başı yana çevrilir, göbəklə döş sümüyü arasına iki əllə təzyiq edilir.
Bu hərəkəti 5-7 dəfə yad cisim çıxana qədər ya da kömək gələnə qədər davam etdirmək lazımdır.

Nəfəs yolu tıxanıqlığının tək başına (xəstə özünüzsünüzsə) aradan qaldırılması üçün qarınınızı stolun kürəyinə dayayın, sonra üst hissəsinə təzyiq tətbiq edin", - deyə şöbə müdiri bildirib.