Coslin adına Diabetin Tədqiqi Mərkəzi tərəfindən aparılan tədqiqatlara görə, prediabetli (gizli şəkər) pasiyentlərin qidasına darçın əlavə etməklə onların sağlamlıq vəziyyətini yaxşılaşdırmaq və qanda şəkərin səviyyəsini normallaşdırmaq olar.

Aztibb.az meddaily.ru resursuna istinadla xəbər verir ki, 51 könüllünün iştirakı ilə keçirilən sınaqlarda üç ay ərzində könüllülərin 50%-i 500 milliqram darçın cövhəri qəbul edib, digərlərinə isə plasebo effekti tətbiq olunub.

Alimlər könüllülərin insulinə həssaslığını və onların qanında şəkərin səviyyəsinin necə dəyişdiyini müşahidə ediblər. Həmçinin yüksək dozada darçın cövhərinin istehlakı nəticəsində yarana biləcək əlavə təsirlər riski də qiymətləndirilib. Müəyyən olunub ki, cövhər qanda şəkərin səviyyəsini sabitləşdirib və bədənin insulinə həssaslığını artırıb. Bununla yanaşı, ciddi əlavə təsirlər müşahidə olunmayıb.

Mütəxəssislərin fikrincə, şəkərin səviyyəsinin yüksəlməsi və insulinə həssaslığın azalması nəticəsində yaranan metabolik sindrom xroniki iltihab səbəbindən inkişaf edə bilər. Piy toxumasında gedən iltihabi proseslər isə olduqca təhlükəlidir.

Bu toxumaların istehsal etdiyi molekullar bədəni piy tədarükü və qanda şəkər toplamağa məcbur edərək qaraciyərin funksiyasını dəyişdirir. Bu zaman güclü antioksidant xüsusiyyətlərinə malik darçın cövhərindən istifadə qeyri-normal prosesləri dayandırır.