Yaz aylarını yaşayırıq. Çoxumuz yazı sevirik. Amma bu mövsümdə insanlarda halsızlıq, qrip, ishal və s. kimi şikayətlər yaranır, həmçinin allergik xəstəliklərin əlamətləri də özünü göstərir.

 

Bu barədə Aztibb.az-a Bakı Baş Səhiyyə Mərkəzinin strukturuna daxil olan 9 nömrəli Uşaq Poliklinikasının həkim-allerqoloqu Aynur Seyidova mövsümi allergiyanın əlamətləri barədə danışarkən deyib.

 

Onun sözlərinə görə, fevral ayının sonundan etibarən ağacların çiçəklənməsi başlayır və bu, may ayının sonuna kimi davam edir. Bitki tozcuqları (polenlər) küləklə uzaq məsafələrə yayılaraq tənəffüs yollarına, gözlərə, dəriyə və saçlara yerləşərək allergiyası olan insanlarda allergik iltihabla özünü göstərir və bu pollinoz və ya mövsümi allergiya adlanır. Mövsümi allergiyanın simptomlarına burunda axıntı (şəffaf), qaşınma, asqırmalar, tutulma, gözlərdə sulanma, qaşınma, qızartı, şişkinlik və s. göstərmək olar.

 

Allerqoloq qeyd edib ki, bronxial astma olan pasiyentlərdə xəstəlik kəskinləşə bilər. Bu zaman öskürək, nəfəs darlığı, xışıltı, dəridə bəzən qaşıntı, övrə əmələ gəlir.

 

A.Seyidova polenlərdən (bitki tozcuqlarından) qorunmağın yolları haqqında da məlumat verib: “İlk öncə qeyd edim ki, polenlər gün ərzində, xüsusilə səhər erkən və günorta saatlarında havada daha çox olur. Yağış yağdıqdan sonrakı bir neçə saat və axşam saatlarında polen sıxlığı nisbətən azalır. Polenlərin çox olduğu mövsümlərdə, xüsusilə səhər və günorta saatlarında, quru və küləkli havalarda məcbur deyilsə, bayıra çıxmayın.

 

Həkim bildirib ki, idman etmək üçün bağlı yerlərə üstünlük verilməlidir: "Başınıza papaq qoyun, gözünüzə eynək taxın, uzun qollu paltarlar geyinin, evə girdikdə bu paltarları dəyişin, bol su ilə duş qəbul edin və ya üzünüzü bol su ilə yuyun. Paltarlarınızı polen mövsümündə evdə qurudun. Qapı və pəncərələrinizi, xüsusilə polenlərin çox olduğu saatlarda bağlı saxlayın. Maşın sürərkən pəncərələri bağlı saxlayın. Bundan başqa, evdə və maşında polen filtrli kondisionerdən istifadə edin”.