Bu barədə Aztibb.az-a məlumat verən Sumqayıt Tibb Mərkəzinin 2 nömrəli Ailə Sağlamlıq Mərkəzinin Terapiya şöbəsinin müdiri, ailə həkimi-terapevt Rəsmiyyə Məhərrəmova bildirib ki, uzun müddət edilən məşqlər əzələ ağrılarına səbəb ola bilir.

 

Onun sözlərinə görə, müəyyən yaşdan sonra başlanılan, xüsusi təyin edilməyən məşqlərdən sonra əzələ ağrıları meydana gələ bilər. Pilates kimi əzələləri gərən məşqlər onurğa və ya oynaq problemi olan şəxslərdə problemlərin yaranmasına səbəb ola bilər. Masaj isə, əzələ içində şiş yarandığı təqdirdə zərər verə bilər.

 

R.Məhərrəmova qeyd edib ki, erkən dövrdə səhv edilən müdaxilələr ciddi əzələ problemlərinin yaranması ilə nəticələnir, yaxşılaşma isə aylarla uzanar. Əzələ narahatlıqlarının yaranma səbəbləri tək fiziki fəaliyyətdən deyil, tibbi vəziyyətlərdən də qaynaqlana bilər. Bunun müalicəsi üçün səbəbi müəyyənləşdirmək insanlar arasında dəyişir və fərdi müayinə ilə diaqnoz qoymaq mümkündür.

 

O, vurğulayıb ki, əzələ ağrıları zamanı ilk 48 saat ərzində bir sıra məsələlərə diqqət etmək lazımdır: “Öncə həmin şəxslər istirahətlərinə fikir verməlidirlər. Ağrılı sahəyə 15, 20 dəqiqə olmaqla gündə üç dəfə buz qoyulmalıdır. Şişi azaltmaq üçün ayaq və ya qolda zorlama olmuşsa yüksək bir yerdə saxlamaq lazımdır. Əzələ ağrısı gedərək artırsa, bir həftədən daha uzun müddətə davam edir, ağrılı əzələ ətrafında qızartı və şişkinlik kimi infeksiya əlamətləri varsa, mütləq həkimə müraciət edilməlidir".

 

Həkim-terapevt əzələ ağrıları ilə birlikdə nəfəs alma çətinliyi də yaranarsa təcili yardıma müraciət etməyin vacibliyini qeyd edib. Bildirib ki, baş gicəllənməsi, əzələ gücsüzlüyü, yüksək atəş və boyun sərtliyi də müşahidə edilən təqdirdə təcili yardıma müraciət etmək lazımdır.