Liv Bona Dea Hospitalının həkimi, tanınmış ürək-damar cərrahiyyə uzmanı Cabir Gülmalıyev ürək xəstələrinin oruc tutanda nələrə diqqət etməli olduqları məqamlara diqqət çəkib.

 

Bu barədə Aztibb.az-a məlumat verən Cabir Gülmalıyev bildirib ki, ürək xəstələri oruc tutmağa qərar verməzdən əvvəl həkimləri ilə məsləhətləşməlidirlər:

 

"Həkiminizdən uzun müddətli susuzluq və aclıq nəticəsində yaşaya biləcəyiniz problemləri öyrənin;

İftarda tez-tez və böyük miqdarda yeməkdən çəkinin;

İftarda daha çox tərəvəz və salatlardan, ət kimi isə balıqdan ibarət pəhriz seçin;

Yağlı qidalardan uzaq durun. Çox yağlı yeməklər qəbul etmək mədə və bağırsaq sisteminə gedən qan miqdarının artması səbəbindən ürəyinizin iş yükünü artıracaq. Bu ani infarktlara səbəb ola bilər;

Gündəlik ehtiyacınız olan qida miqdarını iftar və imsak arasında bölərək az-az və tez-tez yeyin;

Həkiminiz başqa bir şey tövsiyə etməyibsə, iftarla imsak arasında ən az 2 litr su istehlak edin".

 

Uzman həkim qeyd edib ki, hipertoniya və məlum ürək-damar xəstəlikləri olan xəstələrin, xüsusən də dərman qəbul edənlərin bu məsələlərə diqqət yetirməsi həyati əhəmiyyət kəsb edir. Ürək xəstəliklərinin olması bir insanın oruc tutmasına mane ola bilər.