Altsheymer xəstəliyi demensiyaya səbəb olan xəstəliklər arasında ən sıx görülən xəstəliklərdəndir. Son illər bu cür xəstələrin sayında artım müşahidə olunur.

 

Xəstəliyin risk faktorları yaş, cinsiyyət, ailə üzvlərində xəstəliyin olması, yaddaşın itirilməsi ilə nəticələnən kəllə-beyin travmaları, daun sindromu, hipotiroidizm və s. göstərmək olar. Bəzi insanlarda bu xəstəlik simptomları büruzə vermədən uzun illər gizli inkişaf edə bilər.

 

Bu barədə Aztibb.az-a Mingəçevir Şəhər Mərkəzi Xəstəxanasının həkim-nevroloqu Şəbnəm Məmmədova məlumat verib.

 

Onun sözlərinə görə, Altsheymer bəzi xəstələrdə çox yavaş, bəzilərində nisbətən daha sürətlə inkişaf edir.

Xəstəliyin əsas xüsusiyyəti unutqanlıqdır. Yaşlı insanlarda olan hər hansı bir unutqanlıq həkim tərəfindən qiymətləndirilməlidir. Yaşlılıq unutqanlığı ilə xəstəlik əlaməti olan unutqanlıq arasındakı fərq mütəxəssis tərəfindən müəyyən edilməlidir. Bu fərq xəstənin müayinəsi, xəstənin yaxınları tərəfindən verilən məlumatlar, beyin funksiyalarını qiymətləndirən nevropsixoloji qiymətləndirmə və lazım olduqda digər köməkçi müayinələrin (MRT, KT, qan testləri) nəticələri əsasında təyin edilir.

 

Şəbnəm Məmmədova qeyd edib ki, Altsheymer xəstəliyinin başlanğıcında unutqanlıq az olur. Məsələn, xəstə gördüklərini, yediyi yeməyin adını, mağazadan almaq istədiklərini unutmağa başlayır. Zamanla unutqanlıq artır və xəstə ümumiyyətlə yeni hadisələri qeyd etməyə başlayır. Məsələn, 5 dəqiqə əvvəl verdiyi sualı dəfələrlə verə bilər. Nəvələrinin adlarını unuda bilər. Qoyduğu əşyaların yerini xatırlamaya bilər. Ancaq xəstə keçmişindən, xüsusən gəncliyindən və 30-40 yaşlarından təəccüblü bir təfərrüatla da danışa bilər.

 

"Unutqan yaşlı birisi yaxşı bildiyi yolları tapa bilmirsə, evə gedə biləcəyi yolu itirirsə və ya evə gedən yolu çox axtarırsa  Altsheymer xəstəliyindən şübhələnmək lazımdır", - deyən nevroloq Altsheymer xəstəliyinin müalicəsinin psixofarmakoloji metodlarla həyata keçirildiyini diqqətə çatdırıb. Bildirib ki, xəstələrə, eyni zamanda beyin mübadiləsini və beyin qan dövranını yaxşılaşdıran dərmanlar, ürək fəaliyyətinin tənzimləyiciləri müəyyən edilir.