Adətən uşaqlar məktəbə gedən zaman onların lövhəni yaxşı görmədiyi, yazı yazarkən hərfləri bir-birinə qarışdırdığı meydana çıxır. Bunun üçün uşaqların müntəzəm olaraq göz müayinələrindən keçməsi, görmə zəifliklərinin erkən diaqnostikası vacibdir. Diaqnozun düzgün təyin edilməsi müalicənin başlıca prinsiplərindən biridir. Əgər gözdə çəplik, göz qapaqlarının düşüklüyü varsa, bu, əməliyyat üçün göstəriş ola bilər.

 

Aztibb.az xəbər verir ki, bu barədə Mingəçevir Şəhər Mərkəzi Xəstəxanasının həkim-oftalmoloqu Nuriyə İsmayılova məlumat verib.

 

Onun sözlərinə görə, uşaqlarda ən çox rast gəlinən problemlərdən biri də göz tənbəlliyi hesab edilir. Bu, gözlərdən biri və ya hər ikisində görmə faizinin aşağı olması nəticəsində meydana çıxır. Göz tənbəlliyi erkən dövrdə maksimal praktik hədd hesab edilən 7 yaşa qədər aradan qaldırılmalıdır.

 

Oftalmoloq bildirib ki, müasir dövrdə uşaqların sosial şəbəkə və planşetlərdən uzun müddət istifadə etməsi, monitorlarla yaxından təması görmə zəifliyinə səbəb olur. Bu da gözqırpma qüsurları, miopiya, astiqmatizm kimi göz xəstəliklərinin artmasına aparıb çıxarır. Bir dəqiqədə göz 16 dəfə qırpılmalıdır. Lakin monitora diqqətlə baxmaq uşaqlarda qırpma hərəkətlərinin azalmasına, gözdə quruluq və digər xəstəliklərin yaranmasına səbəb olur. Ona görə də məktəbyaşlı uşaqların gün ərzində 1 saatdan artıq monitor qarşısında durması və ya telefonlarla vaxt keçirməsi məsləhət görülmür.