Diareya və ya ishal - boş, sulu və tez-tez baş verən nəcis ifrazıdır. Başqa sözlə, gün ərzində 250 qramdan çox nəcis ifrazı diareya hesab edilə bilər.

 

Aztibb.az xəbər verir ki, Mingəçevir Şəhər Mərkəzi Xəstəxanasının həkim-pediatrı Aynurə Qurbanovanın sözlərinə görə, həftədə 3 dəfədən gündə 3 dəfəyə qədər nəcis ifrazı normal hesab edilə bilər. 1 həftədən az davam edən diareya kəskin diareya adlanır. Əgər diareya 4 həftədən çox davam edirsə bu xroniki diareya adlanır. Uşaqlarda, xüsusilə də 3 yaşından kiçik olanlarda diareya tez bir zamanda dehidratasiyaya gətirib çıxara bilər. Sanitariya qaydalarına əməl edilməməsi üzündən baş verən infeksion diareya daha təhlükəli ola bilər və mütləq həkimin müayinə, müalicəsi vacibdir.

 

Pediatr bildirib ki, diareyanın ən çox rast gəlinən səbəbi virus mənşəli qastroenteritlərdir. Virus infeksiyası mülayim hesab edilir və bir neçə gün ərzində spontan olaraq aradan qalxır. Virus qastroenteriti adətən məktəbdə, məhəllədə və ya ailədə mini-epidemiya şəklində baş verir.

 

"Qida zəhərlənməsi və səyahətdə olmaq diareyanın digər tez-tez rast gəlinən səbəblərindəndir. Bu növ diareyalar bir qayda olaraq bakteriya və parazitlərlə çirklənmiş qida məhsullarının və ya içkilərin qəbulu üzündən baş verir.

Nəzarət olunmayan bağırsaq hərəkətləri, mədə ağrısı, şiddətli qarın sancıları, ürəkbulanma, başgicəllənmə, nəcisdə selikli qişanın görünüşü və yağlı bir quruluşa sahib olması, üşümə və qızdırma, qusma, nadir hallarda qanlı nəcis, qarın boşluğunda şişkinlik və sıx qaz yığılması ishalın əlamətlərindərdir. Bu kimi hallar müşahidə olunarsa mütləq həkimə müraciət etmək lazımdır", - deyə Aynurə Qurbanova bildirib.