2015-ci il təvəllüdlü Jalə Kərimli anadangəlmə qaraciyər yetməzliyindən əziyyət çəkirdi. 4 yaşında qan qusma şikayətləri ilə müxtəlif mərkəzlərdə müalicə almışdı, 5 yaşında isə qızcığaza qida borusunun qanayan damarlarına band liqasiyası edilmişdi.

Aztibb.az xəbər verir ki, bu barədə Səhiyyə Nazirliyinin mütəxəssis-eksperti, Mərkəzi Gömrük Hospitalının Cərrahiyyə və orqan transplantasiyası şöbəsinin rəisi, cərrah transplantoloq, t.ü.f.d. Mircəlal Kazımi feysbuk səhifəsində paylaşım edib:

Paylaşımda bildirilir ki, uşaq müəyyən səbəblərdən əməliyyat oluna bilmirdi. Xəzər TV-nin layihəsi olan "Təsir Dairəsi" verilişinin əməkdaşlarının səyi və xalqımızın yardımları sayəsində 24.02.2023-cü il tarixində Jalə Kərimliyə anası Aybəniz xanımın qaraciyərindən pay verməsi ilə qaraciyər transplantasiyası edilib. Bu, bir insanın həyatı üçün birlikdəliyin, səfərbər olmanın bariz nümunəsi idi.

"Bu gün sizin sayənizdə, böyük bir sevinclə qızımız Jalənin 8 yaşını qeyd etdik", - deyə Jalə Kərimlinin anası Aybəniz xanım transplantoloq Mircəlal Kazımiyə təşəkkür məktubu ünvanlayıb.

Qeyd edək ki, əməliyyatdan sonra verdiyi dəstəyə görə, Akademik M.Ə.Mirqasımov adına Respublika Klinik Xəstəxanasının baş həkimi Rəşad Tağıyevin adı xüsusi vurğulanıb.