Hemifasiyal spazm üzün bır tərəfində qısa müddətli təkrarlanan ritmik olmayan güclü yığılmalardan ibarətdir.

 

Aztibb.az xəbər verir ki, Xətai Tibb Mərkəzinin nevroloqu Sevinc Abışova bu xəstəliyin üz əzələlərinin yüngülcə səyriməsi ilə başladığını bildirib.

 

Nefroloqun sözlərinə görə, əvvəlcə üzün alt yarısında əzələlərin yığılması və ağızda əyilmələrlə özünü göstərir. Səyrimələrin müddəti bir neçə saniyədən bir neçə dəqiqəyə qədər çəkir. Xəstədə ağrı olmur və heç bir nevroloji əlamət qalmır və ən çox orta yaş qadınlarda sıx rast gəlinir.

 

Sevinc Abışova soyuq, yorğunluq və emosional gərginliyin hemifasiyal spazma səbəb olan faktorlar olduğunu qeyd edib.

 

Həkim bildirib ki, xəstəlik xronikləşdikcə üzdə olan səyrimələr daha da tezləşir və sayı artır adətən göz qapağı enir: "Beyində olan şiş, dağınıq skleroz, anevrizma siniri sıxa bilər. Kranial MRT və zədələnmiş əzələni müəyyən etmək üçün EMQ çəkilir. Siniri sıxan səbəbi aradan qaldırmaq üçün cərrahi əməliyyat və ya botox icra edilir”.