Aztibb.az xəbər verir ki, xroniki hepatitlərdə USM-nin rolundan bəhs edən Xətai Tibb Mərkəzinin USM həkimi Arzu Ağalarova bildirib ki, ÜST-nin hesabatına əsasən virus mənşəli xroniki hepatitlərin geniş yayılma dərəcəsinə, uzunmüddətli gedişatına, xoşagəlməz nəticələrinə görə, xəstəliyin vaxtında diaqnostikası vacibdir. USM qaraciyər patologiyalarının diaqnostikasında yayılmış müayinə metodlarından biridir. USM qaraciyərin ölçüləri, parenximasının ekostrukturu və portal hipertenziya olub-olmaması barədə məlumatlar verir. Əlavə olaraq, dalaq, v.lienalis və v.portae kalibrlərinə fikir verilir.

 

Onun sözlərinə görə, USM vasitəsilə xroniki hepatitlərdə homogen parenxima fonunda toxuma sıxlığı (əsasən sol payda), hepatolienal sindrom və parenximanin strukturunda ortadənəvərlik, bəzən xırdaocaqlı heterogenlik aşkarlanır.

 

Arzu Ağalarova qeyd edib ki, bu halda xroniki hepatitlər qaraciyər sirrozu ilə diferensiasiya olunmalıdır: sirrozda ilk mərhələlərdə qaraciyər ölçüləri daha böyüyür, kənarları qeyri-hamar, oval olur. Exostrukturu-ortadənəvər, damar şəkli zəifləyir. Daha sonrakı mərhələlərdə v.portae ve v.lienalis genişlənir. Splenimeqaliya izlənilir. Son mərhələlərdə exostrukturu-iridənəvər, qarın boşluğunda assit müşahidə olunur. Təəssüf ki, USM diaqqnoz qoymaqla kifayət etmir.

 

"USM müayinəsi ilə yanaşı, qanın biokimyəvi analizləri (ALT, AST, QQT, qələvi fosfotaza, bilirubin və onun fraksiyaları, hepatit B, C və koaquloqramma), eləcə də mütləq olaraq elostometriya  fibroskan) müayinəsi məsləhət görülür. Virus hepatitlərin yayılma yolları enteral (su və qida) və parenteral yolla (qan vasitəsilə) olur. Bunu nəzərə alaraq qidalanmalarına və qanla bağlı prosedurlara gedərkən sterilliyə diqqət yetirilməsi məsləhət görülür”, - deyə həkim bildirib.