Histerektomiya (uşaqlığın çıxarılması) – ginekoloji əməliyyat olub, uşaqlığın (çox vaxt uşaqlıq boruları və yumurtalıqlarla birlikdə) çıxarılmasıdır.

 

Aztibb.az xəbər verir ki, Abbas Səhhət adına xəstəxananın Ginekologiya və doğum şöbəsinin uzman mama-ginekoloqu Gülnar Səmədovanın sözlərinə görə, qadın orqanizminin vəziyyətindən və fərdi xüsusiyyətlərindən asılı olaraq, histerektomiyanı ya qarın divarındakı kəsikdən (abdominal histerektomiya), ya da uşaqlıq yolundan (vaginal histerekotomiya) çıxarırlar.

 

G.Səmədova bildirib ki, vaginal histerektomiya zamanı uşaqlıq yolunun yuxarı hissəsində kəsik aparılaraq uşaqlıq çıxarılır. Bu əməliyyat uşaqlıq sallandıqda və kiçik ölçüdə olduqda aparılır. Vaginal histerektomiyadan sonra pasientin bədənində çapıq qalmır. Əməliyyatdan sonra bərpa mərhələsi abdominal histerektomiyaya nisbətən tez və asan keçir:

 

“Son dövrlər vaginal histerektomiyaya abdominal histerektomiyaya nisbətdə daha çox üstünlük verilir, çünki o, daha az invaziv hesab edilir və reabilitasiya - bərpa müddəti qısadır.”

 

Uzman mama-ginekoloq qeyd edib ki, histerektomiya xüsusilə uşaqlıq və ya yumurtalıq xərçəngi olan xəstələrdə vacibdir, çünki bununla xəstəliyin ciddi fəsadlara yol açmasının qarşısı alınır. Uşaqlıq yolunda əmələ gələn miomanın çox olması səbəbindən yaranan şikayətlər də histerektomiya əməliyyatından sonra yox ola bilər.