Bronxial astma – tənəffüs yollarının xroniki iltihabı xəstəliyidir. Nəfəsalmanın çətinləşməsi və öskürəklə müşayiət olunur. Vəziyyət ani olaraq ağırlaşa bilir və xəstə astmatik boğulma təhlükəsi ilə üzləşir. Bu ona görə baş verir ki, xəstə kənar qıcıqlandırıcılara həddindən artıq həssas olur. Qıcıqlandırıcılara cavab olaraq böyük həcmdə selik əmələ gəlir və normal hava axınının qarşısını alır.

 

Aztibb.az xəbər verir ki, bu barədə Mingəçevir Şəhər Mərkəzi Xəstəxanasının həkim-pulmonoloqu Elxan Cəfərov məlumat verib.

 

Həkim bildirib ki, bronxial astma bütün yaş dövründə rast gəlinir, lakin uşaqlarda daha çox özünü göstərir. Müalicəsi onun ilkin inkişaf mərhələsində yetərli olmadığı halda xroniki astma halına keçir və xəstəni ömrü boyu müşayiət edir. Xəstəlik zamanı xəstənin tənəffüs yolları xroniki iltihabın təsiri altında olur. Bu səbəbdən xəstə vaxtaşırı müxtəlif qıcıqlandırıcıların hədəfinə çevrilir. Nəticədə bronx spazması və ödəm şişi yaranır. Artıq miqdarda əmələ gələn selik nəfəsalmanı çətinləşdirir.

 

Elxan Cəfərovun sözlərinə görə, müalicə individual olaraq aparılır. Astmaya səbəb olan faktorlar kənarlaşdırılır və mühit qıcıqlandırıcılardan təmizlənir. Astmanın hansı formaya aid olduğu müəyyənləşdirdikdən sonra müalicəyə start verilir. Xəstə fasiləsiz olaraq 2-4 ay ərzində müalicə alır. Bu müddət ərzində xəstənin sağlamlığı tamamilə bərpa olunur.