Orqanizmin normal fəaliyyəti üçün önəmli olan orqanlardan biri də dalaqdır. Qarın boşluğunda, sol tərəfdə, mədənin arxasında yerləşən bu orqan zəifləmiş qan hüceyrələrini yox edib, yerinə təzə qırmızı qan hüceyrələri istehsal edir və immunitetin güclənməsinə təsir göstərir.

Aztibb.az-lb xəbərinə görə, Mingəçevir Şəhər Mərkəzi Xəstəxanasının həkim-terapevti İlham Əliyev bildirib ki, dalaq xəstələnəndə bədəndə bir sıra problemlər baş verir. Qansızlıq, halsızlıq, həddindən artıq tərləmə, qarında şişlik, tez yorulmaq, nəfəs almaqda çətinlik çəkmək, sol tərəfdə alt qabırğanın altında hiss edilən ağrı dalaqda problem olduğunu göstərən əlamətlərdir.

Onun sözlərinə görə, dalağın xəstəliyi zamanı tərkibində bol miqdarda A vitamini, dəmir, yod olan qidalar qəbul etmək lazımdır. Tərəvəz və meyvələr, xüsusilə də noxud, paxla, lobya kimi qidalar dalağın təmizlənməsinə kömək edir: "Çalışın həftəlik qida rasionunuzda kərəviz, kök, üzüm, ərik, əncir, xiyar, təzə qoz, badam, kələm, şüyüd, cəfəri, və kişmiş, doşab kimi qidalar olsun".