Azərbaycan Tibb Universitetinin (ATU) əməkdaşları Türkiyənin İstanbul şəhərində böyrək transplantasiyası üzrə beynəlxalq kursda iştirak ediblər.
ATU-dan Aztibb.az-a verilən xəbərə görə, Beynəlxalq Transplantasiya Şəbəkəsi (International Transplant Network) və Avropa Orqan Transplantasiya Cəmiyyətinin (ESOT) təşkilatçılığı ilə baş tutan kurs orqan köçürmə cərrahiyyəsi və nefrologiyası kimi iki əsas bölmədən ibarət olub.
Dünyanın 30-dan çox ölkəsindən olan 100-dən artıq iştirakçılar arasında ATU-nun I Cərrahi xəstəliklər kafedrasının müdiri, AMEA-nın müxbir üzvü, professor Nuru Bayramov, Tarnsplantologiya şöbəsinin müdiri, assistent Anar Namazov, uzman həkim Orxan Quliyev və Şəbnəm Qədiməliyeva da olublar.
Yüksəkixtisaslı mütəxəssislər tərəfindən mühazirələr səslənməsi ilə yanaşı, həmçinin kursda transplantasiya mərkəzlərinin təcrübələri nümayiş etdirilib.
Kursun özəlliklərindən biri də burada iştirakçılar qarşısında canlı cəməliyyatların icra olunması, paralel olaraq əməliyyatların xüsusiyyətləri və mərhələləri müzakirə edilməsi olub.
Dünyanın hər yerindən həkimləri bir araya gətirən tədbirdə türkiyəli mütəxəssilər tərəfindən donor nefrektomiyasının həm laparoskopik, həm retroperitoneskopik, həm də robotik üsulları canlı olaraq həyata keçirilib. Böyrək köçürülməsində (həm donor nefrektomiyası, həm də qreftin implantasiyasında) robotun tətbiqi iştirakçılar tərəfindən böyük maraqla qarşılanıb.