22.10.2026-cı il tarixində 2010-cu il təvəllüdlü yeniyetmə ürəkbulanma, təkrarlanan qusma və qarın nahiyəsində kəskin ağrı şikayətləri ilə Kliniki Tibbi Mərkəzin Təcili və Təxirəsalınmaz Tibbi Yardım şöbəsinə gətirilib.

Bu barədə Aztibb.az-a KTM-dən məlumat verilib.

Bildirilib ki, müayinələr nəticəsində pasiyentə trixobezoar (udulmuş saç və ya tüklərin həzm sistemində toplanaraq bərk kütləyə çevrilməsi) diaqnozu təyin edilib və təxirəsalınmaz cərrahi müdaxilə aparılıb.

Uşaq Cərrahiyyəsi şöbəsinin müdiri İlqar Haqverdiyev, uzman uşaq cərrahı Aynur Qurbanova və anestezioloq Elnarə Salamovanın iştirakı ilə pasiyent üzərində trixobezoarın xaric edilməsi və qastrotomiya (mədənin boşluğuna daxil olmaq üçün onun ön divarının cərrahi yolla kəsilməsi əməliyyatıdır) əməliyyatı icra edilib. Əməliyyat zamanı yeniyetmənin mədəsindən onikibarmaq bağırsağına qədər uzanan 30 sm uzunluqda trixobezoar xaric olunub.

Hazırda pasiyentin müalicəsi tibb müəssisəninin müvafiq şöbəsində davam etdirilir. Vəziyyəti stabil qiymətləndirilir.

Qeyd edək ki, mədədən bağırsağa qədər uzanan 30 sm-lik trixobezoarın kənarlaşdırılması nadir rast gəlinən mürəkkəb müdaxilələrdəndir.