Hospitaldan Aztibb.az-a verilən məlumata görə, görüşdə Dövlət Gömrük Komitəsi Tibbi Xidmət İdarəsinin rəis müavini İsmayıl Əfəndiyev, Mərkəzi Gömrük Hospitalının Mama-ginekologiya şöbəsinin rəisi Təranə Bayramova, mama-ginekoloqlar Mehriban Əmirova, Nigar Məmmədova, Raziyyə Tapdıqova və Leyla Qaçayeva, Elmi-Təcrübi və Tədris Mərkəzinin mütəxəssisi Şəhla Mirzəzadə, Orion şirkətinin Azərbaycan üzrə nümayəndəliyinin rəhbəri Rumiyə Kərimova, tibbi nümayəndə Xəyalə Nadirova və digər mütəxəssislər iştirak ediblər.

 

Tədbiri giriş sözü ilə açan İsmayıl Əfəndiyev qonaqları salamlayaraq qadın sağlamlığının qorunmasının, xüsusilə menopauza dövründə tibbi xidmətlərin müasir tələblərə uyğun təşkilinin vacibliyini vurğulayıb. O, Mərkəzi Gömrük Hospitalında Menopauza Sağlamlıq Mərkəzinin yaradılmasının qadınların sağlamlıq vəziyyətinin kompleks qiymətləndirilməsi, fərdi ehtiyaclarına uyğun tibbi dəstəyin göstərilməsi və bu sahədə ixtisaslaşmış xidmətlərin inkişafı baxımından əhəmiyyətini, müasir tibbi yanaşmaların tətbiqinin və peşəkar əməkdaşlığın genişləndirilməsinin vacibliyini qeyd edib.

 

“Orion” şirkətinin Azərbaycan üzrə nümayəndəliyinin rəhbəri Rumiyə Kərimova menopauza dövründə qadın sağlamlığının qorunmasında müasir klinik protokolların, elmi yeniliklərin və beynəlxalq təcrübənin əhəmiyyətini vurğulayıb.

 

Görüş zamanı menopauza dövründə qadınlara göstərilən tibbi xidmətlərin keyfiyyətinin yüksəldilməsi, beynəlxalq təcrübənin öyrənilməsi, elmi-praktik tədbirlərin təşkili, mütəxəssislər arasında bilik və təcrübə mübadiləsinin genişləndirilməsi imkanları ətrafında müzakirələr aparılıb.