Mədə-bağırsaq xəstəliklərinin müalicəsində endoskopik müayinələrin ÖNƏMİ

21.07.2023 16:13

Mədə-bağırsaq xəstəliklərinə daha dəqiq diaqnozun qoyulması üçün endoskopik müayinəyə ehtiyac duyulur. Nəzərə alsaq ki, Ümumdünya Səhiyyə Təşkilatının protokollarına əsasən, hətta heç bir şikayət olmadan da 45-50 yaş arasında hər kəs mütləq endoskopik müayinələrdən keçməlidir, bu zaman sözügedən müayinənin insan həyatı və sağlamlığı üçün nə qədər əhəmiyyət kəsb etməsi aydın olur.

Aztibb.az xəbər verir ki, bu barədə Diaqnoz Tibb Mərkəzinin qastroenteroloq-endoskopisti Rəfael Həsənov məlumat verib.

Həkim bildirib ki, qastroskopiya ilə həzm sisteminin üst hissəsini – qida borusunu, mədəni, onikibarmaq bağırsağını müayinə etmək mümkündür. Bu üsul vasitəsilə qarın ağrısını, mədə-bağırsaqda qanaxma şübhəsini, anemiyanı, iltihabı, həzm sistemi xərçəngini və başqa simptomları aşkar etmək olur. Xəstəliyin dəqiq diaqnozunu qoymaq üçün qastroskopiya müayinəsi zamanı şübhəli bilinən yerlərdən biopsi götürülür.

Rəfael Həsənovun sözlərinə görə, kolonoskopiya yoğun bağırsaq xəstəliklərini müayinə etmək üçün bir üsuldur. Prosedur mikrokameralı fibrokolonoskopun köməyi ilə aparılır. Kolonoskopiya zamanı zond anusdan daxil edilir və fibrokolonoskopun kamerası ilə çəkilən təsvir monitorda göstərilir. Bu müayinə vasitəsilə gizli qanaxmanı, iltihab, şiş və digər patologiyaları müəyyən etmək olur. Qastroskopiya müayinəsi təxminən 5, kolonoskopiya müayinəsi isə patologiyadan asılı olaraq 15-30 dəqiqə çəkir:

"Mədə və bağırsağında narahatlıq hiss edən hər kəs dərhal həkimə müraciət etməlidir. Unutmaq olmaz ki, vaxtında aşkar edilən hər hansı xəstəliyi müalicə etmək daha asandır".