Ş.Ələsgərova 1904-cü il martın 8-də İrəvanda anadan olub. O, ilk təhsilini gimnaziyada alıb, daha sonra Azərbaycan Tibb İnstitutuna daxil olub.

 

Əsasən, ana və uşaqların sağlamlığının qorunması, ginekoloji xəstəliklərin müalicə və profilaktikası kimi mövzuları tədqiqat sahəsinə daxil edən Ş.Ələsgərova Azərbaycanda malyariya və helmintoz xəstəliklərinə qarşı mübarizə tədbirlərində də fəal iştirak edib.

 

O, 1945-ci ildə N.Krupskaya adlı 5 nömrəli klinik doğum evinə baş həkim təyin olunub və ömrünün sonuna kimi həmin vəzifəni yerinə yetirib.

 

Həkimin rəhbərliyi və yüksək təşkilatçılıq qabiliyyəti sayəsində doğum evi respublikanın iri müalicə profilaktika idarəsinə çevrilib və keçmiş ittifaqda geniş şöhrət qazanıb.

 

Ş.Ələsgərova 1958-ci ildə Səhiyyə əlaçısı, 2 il sonra "Əməkdar həkim" adına layiq görülüb. 1969-cu il fevralın 5-də ona xidmətlərinə görə Sosialist Əməyi Qəhrəmanı adı verilib. Ş.Ələsgərova respublikada bu ada layiq görülən ilk səhiyyə işçisi olub.

 

"Şərəf nişanı” ordeni və medallarla təltif edilən Ş.Ələsgərova Azərbaycanda mamalıq və ginekologiya sahəsində sayılıb-seçilən həkimlərdən olub.

 

Qeyd edək ki, TƏBİB-in tabeliyindəki Kliniki Tibbi Mərkəzin nəzdində olan 5 nömrəli Kliniki Doğum Evi onun adını daşıyır.