92%-i sudan ibarət olan qarpız antioksidantlar, A, C, B1, B5, B6 vitaminləri, kalium və maqneziumla zəngindir. Qarpız xərçəng, ürək-damar, dəri və böyrək xəstəlikləri, eləcə də həzm sistemi və iltihab əleyhinə təsirlidir.

Aztibb.az mütəxəssislərin fikirlərinə əsaslanaraq, sağlam qarpız seçərkən bilməli olduğunuz məqamları diqqətinizə çatdırır.
Gübrə verilmiş qarpızlarla gübrə verilməmiş qarpızları necə ayırd edə bilərik?

Gübrəsiz qarpızlar al-qırmızı rəngdə olur, içərisində nazik çəhrayı zoğlar ola bilir və nisbətən az şirin olur. Gübrəsiz qarpıza bıçaq dəyən kimi partlayır. Gübrəli qarpızların qabığı 1 sm qalın olur, içərisində qalın zoğlar olur və daha şirin olurlar.

Ümumiyyətlə qarpızı çox yemək zəhərlənmə həddinə gətirib çıxara bilər.

Əvvəllər qarpız iyul-avqust aylarında yetişirdi. Lakin hazırda əkinçilik vərdişləri dəyişdiyinə, tez yetişən sortlar yaradıldığına, istixanalarda və əkin sahələrində daha müasir aqrotexniki üsullar tətbiq olunduğuna görə məhsul iyun ayında da yetişir.

Məhsulun vaxtından tez yetişməsi onun keyfiyyətinin pis olması demək deyil. Burada əsas diqqət yetirilməli məqam qarpızın yetişdirilməsində gübrələrdən və pestisidlərdən düzgün istifadə edilməsidir. Gübrə növləri və pestisidlər vaxtında və düzgün tətbiq edilməyəndə məhsulun böyüməsinə və məhsuldarlığına səmərəli təsir göstərmir.

Qarpız kəsilən gün istehlak olunması məsləhətdir. Kəsildikdən sonra soyuducuda müvafiq rejimdə saxlanmasına əməl edilməlidir.

Qarpız alarkən onun rənginə, bərkliyinə, ölçüsünə, saplağına fikir verilməlidir. Qarpızın üzərində açıq sarımtıl-yaşıl və tünd yaşıl rəngdə olan zolaqlar, əsasən, bərabər ölçüdə olmalı və sərhədlərlə ayrılmalıdır. Üzərində müşahidə olunan saralmış səthi isə onun torpaqla təmas etdiyi yerlərdir.

Oval olan qarpızlar sulu, yumru olanlar isə şirin olur. Qarpızı kəsməzdən əvvəl onu yaxşı yumaq, təmiz və quru bıçaqla kəsmək vacibdir.