Türkiyənin Antalya şəhərində keçirilən Asiya Ürək-Damar Cərrahiyyəsi Cəmiyyətinin (ASCVTS) 34-cü illik konfransında Mərkəzi Klinikanın həkimləri öz elmi işləri ilə yüksək səviyyədə təmsil olunublar.

 

Konfrans çərçivəsində AÜDCC-nin fəxri sədri, professor Kamran Musayev Hipertrofik Kardiomiopatiyaların cərrahi müalicəsinə həsr olunmuş sessiyada məruzə ilə çıxış edib, eyni zamanda müxtəlif elmi sessiyalara sədrlik edərək beynəlxalq elmi müzakirələrə mühüm töhfə verib.

 

Kamran Əhmədov Anadangəlmə ürək qüsurlarının mini-invaziv cərrahiyyəsi sahəsində Mərkəzi Klinikanın təcrübə və nəticələrini təqdim etmiş, bu istiqamətdə əldə olunmuş nailiyyətləri beynəlxalq auditoriya ilə bölüşüb.

 

Konfransda Mərkəzi Klinikanın həkim-rezidentləri Faxrəddin Ələkbərov və İlkin Osmanov da e-poster təqdimatları ilə iştirak edərək elmi fəaliyyətə aktiv şəkildə qoşulublar.

Ümumilikdə, konfransda Mərkəzi Klinikadan 6 elmi iş qəbul edilib ki, bunlardan 1-i şifahi məruzə (oral təqdimat), 5-i isə e-poster formatında olmuşdur. Bu göstəricilər mərkəzin elmi fəaliyyətinin və beynəlxalq səviyyədə tanınmasının bariz nümunəsidir.

 

Mərkəzi Klinikanın bu cür nüfuzlu beynəlxalq konfranslarda fəal iştirakı ölkəmizdə ürək-damar cərrahiyyəsinin inkişafına, elmi bilik və təcrübə mübadiləsinin genişlənməsinə, eləcə də Azərbaycan səhiyyəsinin beynəlxalq aləmdə təmsil olunmasına mühüm töhfə verir.