Tanınmış cərrah-uroloq, transplantoloq, Səhiyyə Nazirliyinin Orqan Transplantasiyası üzrə mütəxəssis-eksperti, Dövlət Təhlükəsizliyi Xidmətinin Hərbi-Tibb Baş İdarəsinin Elmi-Təcrübə Mərkəzinin rəisi, Azərbaycan Respublikası Böyrək Transplantasiyası sahəsində Mütəxəssislər Assosiasiyasının İdarə Heyətinin sədri, tibb elmləri doktoru Rəşad Şolan Azərbaycan Tibb Universitetinin Tədris Terapevtik Klinikasında təşkil olunmuş “Nefrologiya və böyrək transplantasiyasında klinik təcrübələr və gələcək perspektivlər” mövzusunda elmi-praktiki konfransda moderator və məruzəçi qismində iştirak edib.

Aztibb.az xəbər verir ki, bu barədə Rəşad Şolan öz feysbuk səhifəsində paylaşım edib.

Paylaşımda bildirilib: “Nefrologiya və böyrək transplantasiyasında kliniki təcrübələr və gələcək perspektivlər” adlı elmi-praktiki konfransda həm moderator, həm də məruzəçi qismində iştirak etdik. Toplantı elmi olaraq zənginliyi ilə bərabər ciddi diskussiyalarla yadda qaldı. Dəvət üçün professor Məlahət Sultanovaya və professor Aytən Məmmədzadəyə təşəkkürümü bildirirəm. Komandamızın transplant-nefroloqu Nərgiz Baxşəliyevanın məruzəsi də maraqla qarşılandı. Ümumilikdə çox faydalı və məzmunlu bir elmi toplantının şahidi olduq".

Qeyd edək ki, konfransın məqsədi nefrologiya sahəsində əldə olunan müasir klinik təcrübələrin müzakirəsi, böyrək transplantasiyası sahəsində yeniliklərin paylaşılması və gələcək inkişaf perspektivlərinin dəyərləndirilməsi olub. Tədbirdə sahə üzrə mütəxəssislər, həkimlər, rezidentlər və tələbələr iştirak ediblər.