İnsanın sutka ərzində normal fəaliyyət göstərmək üçün orta hesabla 1200-1400 kkall enerjiyə ehtiyacı var. Bu ehtiyac qəbul edilmiş qida maddələrinin hesabına əmələ gəlir. Bu proses su və metabolizimdə iştirak edən fermentlərin iştirakı ilə həyata keçirilir.

 

Aztibb.az xəbər verir ki, bu barədə Nərimanov Tibb Mərkəzinin Endokrinologiya şöbəsinin müdiri Leyla Abbasova bildirib.

 

Həkim qeyd edib ki, suyun qəbulunun azalması qida maddələrinin enerjiyə çevrilməsi prosesini yəni, metabolizm prosesini zəiflədir. Metabolizmin sürətinin yüksəlməsi məqsədimiz olduqda, ilk növbədə, pasiyent tərəfindən qəbul edilən suyun miqdarını 2-3 litrə qədər artırmaq məqsədəuygundur. Bu, həm də metabolim nəticəsində əmələ gəlmiş qalıq maddələrin orqanizmdən kənarlaşmasını təmin edir:

 

"Digər tərəfdən metabolizmin sürətininin fermetlərin aktivliyindən və miqdarından da asılı olduğunu bilirik. Bu fermentlərin orqanizmdə sintezi, proseslərin sürətinə təsiri qida ilə qəbul edilən vitamin və mikroelementlərdən asılıdır".

 

Leyla Abbasovanın sözlərinə görə, metabolizmin sürətlənməsində əsas faktorlardan biri və ən vacibi fiziki aktivlikdir. Xaricdən orqanizmə daxil olmuş enerji ilə, onun həyat fəaliyyətinə sərf etdiyi enerji arasındakı asılılıq məhz fiziki aktivliklə müəyyənləşir. Bu asılılıq arasında əmələ gəlmiş fərq insanların çəkisini formalaşdırır. Çəkinin azalmasına təsir edən digər vacib faktor isə gecə yuxusunun normal və stabil olmamasıdır. Buna görə, ilk növbədə gecə yuxusunun kefiyyəti artırılmalıdır.

 

Endokrinoloq əlavə edib ki, qidanın miqdarı və tərkibi onun əmələ gətirdiyi enerjinin miqdarına birbaşa təsir edir. Əgər məqsədimiz çəkinin azalmasıdırsa, deməli qidanın tərkibində kalorisi çox olan qidaların, yəni tez həll olan karbohidratların (un və şəkər tozu məmulatlarının) və yağın qəbulu azaldılmalıdır. Əvəzinə zülal qəbulu artırılmalıdır.