BBSM-dən Aztibb.az-a verilən xəbərə görə, “Bakı Baş Səhiyyə Mərkəzi” PHŞ-ın tabeliyində fəaliyyət göstərən 6 nömrəli Şəhər Poliklinikasında 5 nəfər 1-ci qrup, 2 nəfər isə 2-ci qrup görmə qabiliyyəti məhdud olan şəxslər əmək fəaliyyəti ilə məşğuldur. Onlardan 6 nəfəri masaj üzrə tibb bacısı və tibb qardaşı vəzifələrində, 1 nəfəri isə müalicəvi bədən tərbiyəsi üzrə təlimatçı vəzifələrində işləyir. Həmin şəxslərdən biri də Cəfərova Firuzə Siyasət qızıdır.

 

Firuzə Cəfərova 1960-cı ildə Neftçala rayonunda anadan olub. Orta təhsilinə Neftçala rayonunda başlayan F.Cəfərova daha sonra təhsilini Bakı şəhərində yerləşən gözdən əlil uşaqlar üçün olan Respublika İnternat Orta Məktəbində davam etdirib, daha sonra isə müalicəvi masaj üzrə təhsil alıb.

 

F.Cəfərova 1-ci qrup görmə qabiliyyəti məhdud olan şəxsdir. O, 1992-ci ildən 6 nömrəli Şəhər Poliklinikasında masaj üzrə tibb bacısı vəzifəsində fəaliyyət göstərir. Həmsöhbətimiz fəaliyyət göstərdiyi 30 il ərzində həmişə doğma kollektivdən hörmət gördüyünü, həmkarlarının ona qarşı xüsusi həssaslıqla yanaşdığını deyir:

 

“Artıq 30 ildən çoxdur ki, bu poliklinikada işləyirəm. İndiyədək 7 baş həkim dəyişib, hər birindən də özümə və həmkarlarıma qarşı diqqət və qayğı görmüşəm. Məndən başqa bu poliklinikada 6 nəfər də görmə qabiliyyəti məhdud olan şəxslər işləyir. Onlardan bir neçəsi işə yeni qəbul olunub. Nəinki müəssisə rəhbərinin, şöbə müdirlərinin, digər həkim heyətinin də münasibətindən razıyıq. Əmək haqqımız da qənaətbəxşdir. Bilirik ki, rəhbərlik tərəfindən sosial vəziyyətimizin yaxşılaşdırılması üçün ardıcıl tədbirlər həyata keçirilir. Bu 30 il ərzində pasiyentlərlə bağlı da çox yaddaqalan xatirələrim olub”.

 

F.Cəfərova qeyd edib ki, görmə qabiliyyəti məhdud olan şəxslərin barmaqlarının balınclarında reseptorlar güclü olur. Bizim əlimizdə müsbət biotoplar çoxdur. Biz xəstənin ağrı yerinin nöqtəsini bu reseptorlar vasitəsilə daha dəqiq müəyyən edə bilirik.