Xəstələrin tənəffüsünün dayandığı və yetərsiz olduğu acil durumlarda hava yolunun intubasiyası tətbiq olunur. Bunun üçün optimal variant endotraxeal intubasiyadır.

Bu barədə Aztibb.az-a Binəqədi Tibb Mərkəzinin həkim anestezioloq-reanimatoloqu Ramiz Vəliyev məlumat verib.

Onun sözlərinə görə, təcrübəli bir anestezioloqun larinqoskop istifadə edərkən, 3 cəhd və 10 dəqiqədən artıq vaxt ərzində intubasiyanı gerçəkləşdirməməsi "çətin intubasiya" adlanır.

Həkim qeyd edib ki, çətin intubasiyaların 7%-i qadın doğum cərrahiyyəsində rast gəlinir. Anatomik quruluşda problemi olan, çənə və boyun quruluşunda problem olan, diş və çəki problemi, saqqal və bığ, xoruldama və sair olan xəstələrdə intubasiyanı təxmin etmək olur. Mallampati deyilən bir siniflənmə vardır ki, orofarinksin quruluşuna əsasən 4 dərəcəyə bölünür. Mallampati dərəcəsi 2-dən böyük olarsa, çətin intubasiya ilə qarşılaşacağınıza hazır olmalısınız.

"Əgər larinqoskopla cəhdləriniz alınmırsa, laringeal maska, bronxoskop, video larinqoskopdan istifadə etmək lazımdır.

Video larinqoskopda mikro kamera sayəsində görüntü səs tellərinin bir neçə santimetr uzağından əldə edilərək monitora ötürülür. Dolayısıyla, səs tellərinin dəqiq görüntüsü eldə edilir ki, bu da çətin intubasiyanı asanlaşdırır, boyunun geri hərəkət etdirilməsinə və dil kökünün yuxarı qaldırılmasına ehtiyac qalmır və intubasiya prosesinin müddəti qısalır", - deyə Ramiz Vəliyev bildirib.