Liv Bona Dea Hospitalının həkimi, tanınmış ürək-damar cərrahiyyə uzmanı Cabir Gülmalıyev Aztibb.az-a qapalı bypass əməliyyatının üstünlərindən danışıb.

 

Həkim bildirib ki, döş qəfəsini kəsməyə ehtiyac qalmadan qabırğalar arasından (MIDCAB) 3-5 sm-lik kəsik yolu ilə həyata keçirilən bypass əməliyyatı tibbi və estetik baxımdan bir çox üstünlüyə malikdir.

 

Onun sözlərinə görə, xəstədə böyük kəsik aparılmadığı üçün infeksiyaya yoluxma riski daha azdır. Qan itkisi də az olur. Bu, qan köçürülmə ehtimalı və antibiotiklərdən istifadəni azaldır.

Bundan başqa, döş sümüyü kəsiləcəyi üçün ürək əməliyyatını təxirə salan xəstələr var. Kiçik bir kəsiklə həyata keçirilən MIDCAB üsulu, bu qorxunu yaşayan xəstə qrupu üçün əla alternativdir.

 

Əməliyyatdan sonra xəstələrin çox az ağrı hiss etdiklərini deyən Cabir Gülmalıyev bildirib ki,  MIDCAB əməliyyatından çıxdıqdan bir neçə gün sonra avtomobil idarə edə bilərsiniz. Əməliyyatdan dərhal sonra yan üstə uzana bilərsiniz. Həmçinin tənəffüs hərəkətləri daha rahat yerinə yetirilir. Hərəkət məhdudiyyətinin olmaması səbəbindən xəstələr qısa müddətdə iş və şəxsi həyatlarına qayıda bilirlər.