Bətndaxili inkişafın ləngiməsi (BDİL) perinatal xəstələnmə və ölümün, həmçinin neonatal dövrdə adaptasiya pozğunluğunun ən çox rast gəlinən səbəblərindən biridir.

Binəqədi Tibb Mərkəzinin həkim-neonatoloqu Məlahət Məmmədova Aztibb.az-a bildirib ki, müasir dövrdə bətndaxili böyümə və inkişafın pozulması probleminə xüsusi diqqət yetirilir.

Onun sözlərinə görə, ana bətnində dölün hestasiya yaşına uyğun olmayaraq inkişafının geri qalmasına BDİL sindromu deyilir. Azərbaycanda bu sindrom yenidoğulmuşların 8-10 %-də təsadüf olunur.

Həkim qeyd edib ki, BDİL sindromunun diaqnozunda aşağıdakı hallar nəzərdə tutulur:

Etioloji faktorlar və risk vəziyyəti
Klinik variantlar
Ağırlıq dərəcəsi

M.Məmmədova bildirib ki, müalicənin xarakteri və həcmi ağırlaşmaların olmasından və yanaşı xəstəliklərin olmasından asılıdır:

"BDİL sindromu ilə doğulan uşaqlar həyatının sonrakı illərində pediatr, nevropatoloq, psixoloq və digər mütəxəssislərin nəzarəti altında olmalıdır".