Quru göz sindromu gözün təbii mayesinin və nəmləndirilməsinin xroniki çatışmamazlığından meydana gələn patoloji vəziyyətdir. Simptomları gözlərdə quruluq, göynəmə, qızartı və yanma hissidir. Quru gözün digər bir əlaməti yad cisim hissiyatıdır ki, bu zaman siz gözünüzdə nəsə qalmış kimi hiss edirsiniz.

 

Bu barədə Aztibb.az-a Nərimanov Tibb Mərkəzinin oftalmoloqu Fatma Maayeva məlumat verib.

 

Onun sözlərinə görə, sindromun adına əks səslənsə də quru göz sindiromu zamanı gözlərin sulanması da ola bilir. Buna səbəb quruluğu aradan qaldırmaq üçün göz yaşı istehsalının artmasıdır.

 

Oftalmoloq quru göz sindromunun səbəblərini də sadalayıb:

Göz qapaqlarının natamam bağlanması hər hansı bir səbəbdən;

Göz qapağı xəstəlikləri və göz yaşı vəzilərinin patalogiyası;

Hormonal pozğunluqlar;

Ətraf mühit amilləri (iqlimin quru və tozlu olması kimi);

Bir çox dərmanların məsələn antihistamin, antidepressantların və s. istifadəsi;

Kompüter qarşısında uzun müddət vaxt keçirmək, kontakt linza istifadəsi.

 

Fatma Maayeva qeyd edib ki, quru göz bir çox sistem xəstəliklərin (revmatoid artrit, qurdeşənəyi, Şeqren sindromu və s.) simptomu kimi də biruzə verə bilər. Müalicəsində ən çox istifadə olunan süni göz yaşı damcılarıdır.