Sağlam həyat tərzinin ən vacib komponentlərindən biri məhz sağlam yuxunun təmin edilməsidir. Yetkin insan orta hesabla sutkada 7-8 saat yatmalıdır. Lakin keyfiyyətli zaman seçimi də mühüm rol oynayır.

 

Aztibb.az xəbər verir ki, 20 nömrəli Şəhər Poliklinikasının həkim-terapevti Günel Fətəliyevanın sözlərinə görə, keyfiyyətli yuxu rejimi üçün gecə saat 00:00-03:00 aralığında yuxuda olmaq və səhər erkən oyanmaq vacibdir - təqribən 00:00-07:00 aralığı:

 

“Yuxu rejiminin düzgün qurulmasının insan orqanizminə bir çox faydaları var. Belə ki, sağlam yuxu mərkəzi sinir sisteminin özünü bərpa etməsinə, diqqət, konsentrasiya, yaddaşın güclənməsinə, immun sisteminin möhkəmlənməsinə, bir sıra xəstəliklərin qarşısının alınmasına, yorğunluq və stressin aradan qalxmasına, həzm, mübadilə proseslərinin yaxşılaşmasına, piylənmənin qarşısının alınmasına, sümük və əzələlərin güclənməsinə, dərinin təravətlənməsinə və s. səbəb olur”.

 

Yuxunun keyfiyyətli olması üçün bir sıra şərtlərə əməl etmək tövsiyə olunur:

Axşam yeməyində yüngül qidalara üstünlük vermək;

Yuxudan öncə çay, qəhvə, qazlı içkilər yerinə süd və ya meyvə şirəsi içmək;

Yuxudan 2-3 saat əvvəl alkoqollu içki və siqaret istifadəsini məhdudlaşdırmaq;

Yuxudan 1-2 saat əvvəl yürüş etmək, yatmadan öncə ilıq duş qəbul etmək;

Gündüz saatlarında ən çox 30 dəqiqə mürgüləmək məsləhətdir;.

Yataq otağı qaranlıq, sakit və bir qədər sərin olmalıdır;

Yatmaq vaxtından 90 dəqiqə əvvəl televizor, mobil cihazları izləmək olmaz.

 

 

Həkim qeyd edib ki, sağlam yuxunun təməlində yuxu rejimi də çox önəmlidir. Yuxuya getmək və yuxudan oyanmaq saatları stabil olmalıdır!