İsveçrə alimləri epilepsiya xəstəliyinin müalicəsində istifadə oluna biləcək yeni cihaz hazırlayıblar.

Aztibb.az-ın https://medimagazin.com.tr-yə istinadla xəbərinə görə, yumşaq robot texnologiyası və aktivləşdirmə təcrübələrindən istifadə edən alimlərin hazırladıqları yumşaq elektrodun epilepsiya və bəzi nevroloji xəstəliklərin müalicəsində istifadə olunacağı bildirilib.

“Science Robotics” jurnalında dərc olunan araşdırma, beyin fəaliyyətini təhlükəsiz və daha az müdaxiləli şəkildə izləmək imkanı təklif edir.  Yeni yaradılmış elektrod kəllədəki kiçik dəlikdən keçə bilir və beynin səthinə yerləşdirilir.

Altı qolu silindrik kapsulda gizlədilmiş elektrod son dərəcə yumşaq və kiçik olduğu üçün kəllədəki 1,2 santimetr diametrli dəlikdən keçə bilir.

Kəllədən daxil edilən elektrodun qanadları bir-bir açılır. Tamamilə açıldıqdan sonra dörd qat böyüklüyünə çatan cihaz onu beyin qabığına yerləşdirir.

Cihazın yumşaq materialı incə beyin toxumasına təzyiqi minimuma endirmək üçün nəzərdə tutulub. Materialın elektriklə aktiv olması beyindən gələn məlumatların qeydə alınmasını təmin edir.

Qurğunun epilepsiya xəstələrində epilepsiya tutmalarını qeyd etmə xüsusiyyəti sayəsində məlumat toplayaraq müalicə ilə bağlı mühüm məlumatlar verəcəyi bildirilir.

Donuzlar üzərində uğurla sınaqdan keçirilən elektrod İsveçrənin tibbi cihaz istehsalçısı Neurosoft Bioelectronics tərəfindən istehsal olunacaq.