Aztibb.az-ın xəbərinə görə, 46 yaşlı zabit Əliağa Şıxlinski ilə rastlaşan Nigar xanım 1909-cu il 27 oktyabr tarixində onunla ailə həyatı qurub.

 

Birinci dünya müharibəsinin iştirakçısı olan xanım general Ə.Şıxlinskinin həyat yoldaşı kimi 1914-1918-ci illərdə zabit arvadlarının yaratdığı "Qırmızı xaç" adlı hərbi xəstəxanaya başçılıq edən komitənin sədri seçilib. O, yaralı əsgərlərə tibbi yardım göstərib, yaralılara kömək olaraq onların qohumlarına rus, tatar və qazax dillərində məktublar yazıb. Nigar xanımın rəhbərlik etdiyi xəstəxana sonradan məşhurlaşıb və ora "Şıxlinski xəstəxanası” deyilib. 

 

Nigar Şıxlinskaya, həmçinin 1914-cü ildə yaradılan Qadın Xeyriyyə Cəmiyyətinin də sədri olub.

1920-ci il martın 10-da Əliağa Şıxlinskinin və Fətəli Xan Xoyskinin təşəbbüsü ilə Azərbaycan Qızıl Aypara Cəmiyyəti təsis edilib. Nigar Şıxlinskaya Azərbaycan Qızıl Aypara Cəmiyyətinin "Şəfqət xidməti”nin banisi olub. Həmçinin Nigar xanım məqalələr yazıb, dul qadınların, ailədən məhrum olmuş uşaqların haqlarını qoruyub.

Əliağa Şıxlinski öz xatirələrində yazıb: "Mənim həyatımın ən xoşbəxt anları Nigar xanımla birlikdə keçirdiyim 22 il olub".