Zaqatala Rayon Mərkəzi Xəstəxanasında görkəmli oftalmoloq-alim, akademik Zərifə xanım Əliyevanın 100 illik yubileyinə həsr olunmuş tədbir keçirilib.

 

Aztibb.az-a Xəstəxanadan verilən xəbərə görə, əvvəlcə Ümummilli Lider Heydər Əliyevin, akademik Zərifə Əliyevanın və torpaqlarımızın ərazi bütövlüyü uğrunda canından keçmiş şəhidlərin xatirəsi bir dəqiqəlik sükutla yad edilib.

 

Tədbirdə xəstəxananın direktoru Tamara Nurəliyeva çıxış edərək bildirib ki, tariximizdə silinməz iz qoymuş, Azərbaycanın ən parlaq və tanınmış simalarından olan görkəmli oftalmoloq-alim, ictimai xadim, akademik Zərifə Əliyevaya əbədiyaşarlıq qazandıran onun nəcib niyyəti, xeyirxah əməlləri, vətən naminə gördüyü böyük işlərdir: “Bu gün keçirdiyimiz anım tədbiri isə Zərifə xanım Əliyevanın əziz xatirəsinə sonsuz ehtiramın ifadəsidir".

 

Direktor qeyd edib ki, akademik Zərifə Əliyeva bütövlükdə öz parlaq fəaliyyəti ilə tarix salnaməsinə əbədi həkk olunmuş şərəfli və mənalı bir ömür yaşamış, elmin çətin yollarında inamla irəliləyərək tibb elminin ən uca pillələrinə yüksəlmiş, məsuliyyətli, eyni zamanda, ibrətamiz və nümunəvi bir həyat yolu keçmişdir.

 

Daha sonra xəstəxananın həkim-oftalmoluqu Sədaqət İsayevə akademik Zərifə Əliyevanın zəngin mənəvi keyfiyyətləri, oftalmologiya elminin inkişafındakı xidmətlərini diqqətə çatdırıb. O, görkəmli oftalmoloqun təkcə respublikamızda deyil, həmçinin beynəlxalq aləmdə də tanınmış alim, ziyalı, ictimai xadim kimi xatirələrdə yaşadığını vurğulayıb. Qeyd olunub ki, alimin zəngin elmi irsi, oftalmologiyanın müxtəlif sahələri üzrə apardığı tədqiqatlar, qazandığı nailiyyətlər, yaratdığı fundamental əsərlər Azərbaycan tibb elminin parlaq səhifəsidir.

 

Tədbirin sonunda Zərifə Əliyevanın həyat yolu və elmi fəaliyyətindən bəhs edən qısametrajlı sənədli film nümayiş olunub.