Dünya əhalisinin demək olar ki, üçdə bir hissəsi vərəm xəstəliyinə yoluxub. ÜST-nin məlumatına görə, hər il bu xəstəliyə 10 milyon insan yoluxur, 3 milyon insan ölür. Vərəm xəstəliyinin yayılmasının qarşısını almaq üçün vərəmin erkən aşkarlanması, dəqiq diaqnostikası, effektiv müalicəsi, vərəm mikobakteriyaları ifraz edən xəstələr ilə təmasların müəyyənləşdirilməsi, onların profilaktik müalicəyə cəlbi, vərəmin latent (gizli) formaları olan şəxslərin aşkarlanması, müalicəyə cəlbi, risk qruplarının müəyyən olunması vacibdir. Bu səbəbdən əhali arasında epidemiya əleyhinə tədbirlərin aparılması, ümumi tibb şəbəkələrində vərəmin erkən aşkarlanması üçün müvafiq profilaktik tədbirlərin, yəni vərəmə görə minimum müayinələrin (əhalinin ildə bir dəfə rentgen flüoroqrafiyaya, tuberkulindiaqnostikaya, bəlğəmin müayinəsinə cəlbi) aparılması vacib amillərdəndir.

 

Aztibb.az xəbər verir ki, bu barədə TƏBİB-in tabeliyindəki Bakı Baş Səhiyyə Mərkəzinin nəzdində fəaliyyət göstərən 1 nömrəli Vərəm Əleyhinə Dispanserin baş həkiminin müavini Mehin Şıxlinskaya məlumat verib.

M.Şıxlinskaya bildirib ki, vərəm mikobakteriyaları ağciyərlərdə və ağciyərdən kənar digər orqanlarda xəstəlik törədir. Vərəm xəstəliyinin erkən aşkarlanma dövründə xəstəlikdən tam sağalma mümkündür. Bu xəstəliyin müalicə müddəti proqrama əsasən 6 aydan 18-24 aya qədər davam edir: 

 

“Vərəm xəstəliyinin simptomları 2-3 həftədən artıq bəlğəmli öskürək, qanhayxırma, döş qəfəsində ağrı, 2-3 həftədən artıq hərarətin olması, tərləmə, xüsusən gecə tərləməsi, arıqlama, intoksikasiya əlamətləri, ümumi zəiflik, halsızlıq və sairdir. Sözügedən hallarda mütləq həkimə müraciət etmək və ətraflı müayinə olunmaq lazımdır.

Son olaraq qeyd edim ki, hər bir vərəm xəstəsi sanitar-gigiyenik qaydalara əməl etməli, müalicəsinə qarşı məsuliyyətli olmalı, təmaslarla arasındakı məsafəni gözləməlidir”.