Ürək tutmasından ani ölümlərin sayı günü-gündən artır və bu vəziyyətin əsas səbəbləri arasında genetik faktorlar, qeyri-sağlam qidalanma və hərəkətsizlik, başqa sözlə, oturaq həyat tərzi var.

Aztibb.az-ın məlumatına görə, Liv Bona Dea Hospitalının həkimi, tanınmış ürək-damar cərrahiyyə uzmanı Cabir Gülmalıyev bildirib ki, qəfil infarkt riskini azaltmaq üçün həyat tərzi vərdişlərinizi tənzimləməlisiniz.

Həkim bildirib ki, daimi idmanla məşğul olmaq lazımdır. Sağlam həyata nizamlı idman etməklə nail olmaq olar. Doymuş yağ turşuları az olan qidalara üstünlük vermək məsləhətdir:

"Qatı yağlardan, marqarin kimi emal edilmiş məhsullardan və heyvani yağlardan çəkinin. Ətin yağsız hissələrini istehlak edin. Tərəvəz və meyvələrlə zəngin bir pəhrizə riayət edin".

Onun sözlərinə görə, siqaret infarkt riskini artırır. Siqaret çəkməklə gözlənilən ömür qısalır. Bundan başqa, yüksək təzyiq ürək xəstəliklərinin mühüm səbəblərindən biridir. Həmçinin damarlarda pis xolesterin toplananda ateroskleroz və buna bağlı infarkt riski artır.

Cabir Gülmalıyev qeyd edib ki, şəkəri nəzarət altına almaq lazımdır. Qan şəkərini nəzarət altında saxlamaq infarkt riskini azaldacaq. Eyni zamanda, stress infarktın əsas səbəbləri arasındadır.

"Gündə 7-8 saat keyfiyyətli yuxu yatan insanların ürək xəstəliyinə tutulma riski daha azdır.

Mütəmadi olaraq müayinələrdən keçin. İnfarktın qarşısını almaq üçün mütəmadi olaraq həkimə müraciət etməli, təzyiq və xolesterin səviyyənizi ölçməlisiniz. Xüsusilə 40 yaşdan sonra ildə bir dəfə müayinədən keçməyi tövsiyə edirik".