Ürək qapaq xəstəlikləri mexaniki problemlər olduğu üçün adətən dərmanla (medikamentoz) müalicə edilməz. Dərman müalicələri sadəcə xəstəliyin ağırlaşmasının qarşısı alır yaxud da simptomları zəiflədir.

Aztibb.az xəbər verir ki, bu barədə Liv Bona Dea Hospitalının həkimi, tanınmış ürək-damar cərrahiyyə uzmanı Cabir Gülmalıyev məlumat verib.

Onun sözlərinə görə, ürək qapaq xəstəlikləri ağırlaşmış hallarda ürək çatışmazlığı, iflic, ritm pozğunluqları və ya bəzən ani ölümə yol aça bilər. Bu səbəblə qapaq xəstəliyi olan xəstələrdə mütəmadi olaraq exokardioqrafiya ilə izlənmə aparılmalı və qapaq əməliyyatı üçün ən uyğun zamanın seçilməsi lazımdır.

Uzman həkim qeyd edib ki, xəstələrə bir müddət dərmanla nəzarət edilsə də müəyyən zamandan sonra ürək qapağında cərrahi müdaxiləyə ehtiyac olacaqdır. Əməliyyatla qapağın bərpası və ya bütünlüklə dəyişdirilməsi lazım gələ bilər.