İnsult beyin qan dövranının kəskin pozulması nəticəsində baş beyində ocaqlı zədələnmənin yaranması ilə xarakterizə olunur və kliniki, laborator, tomoqrafik müayinələrinin nəticələri əsasında diaqnoz qoyulur. İnsult əksər hallarda bədənin sağ və ya sol yarısında ətraflarda qəfil zəiflik, üz sinirinin birtərəfli iflici (parezi), halsızlıq, əzələ gücünün itməsi və ya enməsi, müvazinət pozulmaları, şüurun bulanıq olması, nitq və görmənin pozulması, başgicəllənməsi ilə təzahür edir.

 

Aztibb.az xəbər verir ki, bu barədə Mingəçevir Şəhər Mərkəzi Xəstəxanası Poliklinika şöbəsinin nevropatoloq həkimi Xəyalə Əliyeva məlumat verib.

Onun sözlərinə görə, insult işemik və hemorragik xarakter daşıya bilər. İşemik insult - qan təchizatının çatışmazlığı nəticəsində beynin ocaqlı (fokal) zədələnməsindən əmələ gələn insult növüdür. Bu sindrom 24 saatdan çox çəkən və ya bir sutka ərzində ölümə gətirib çıxaran nevrolojı simptomların kəskin inkişafı ilə xarakterizə olunur. Qanaxma tipli insult isə qəfil baş verir, başın yanlara dönməsi zamanı ürəkbulanma və qusma halları müşahidə olunur. Kəskin və şiddətli baş ağrıları, başda isinmə hissi və yanma hiss edilir. Hemorragik insult - beyindəki qan damarından beyinə qan sızdıqda meydana gəlir. Xəstəliyin rast gəlinmə faizi işemik insultdan daha azdır. Lakin buna baxmayaraq, insult nəticəsində ölümlərin 30%-i bu növdən qaynaqlanır.